កម្លាំង នៅតែជាបញ្ហាចោទរបស់ក្រុមជម្រើសជាតិ ប៉ុន្ដែ Honda ឆ្លើយបែបនេះទៅវិញ

ភ្នំពេញ៖ គ្រូបង្វឹក និងជាអ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បាននិយាយថា បញ្ហាកម្លាំងនៅតែជារឿងចោទសម្រាប់ក្រុមជម្រើសជាតិ ប៉ុន្ដែលោកបានបញ្ជាក់ថា គ្មានកីឡាករអាចរត់បានឥតខ្ចោះរហូតដល់ ៩០នាទីនោះទេ។ 

 

ថែ្លងក្នុងសន្និសីទសារព័ត៌មានក្រោយចប់ការប្រកួតកាលពីម្សិលមិញ អតីតកីឡាករក្រុមជម្រើសជាតិជប៉ុននេះ បាននិយាយថា៖

«ប្រាកដណាស់ កម្លាំងនៅតែជាបញ្ហា ប៉ុន្ដែចម្លើយមួយទៀត ខ្ញុំគិតថាគ្មានអ្នកណាម្នាក់អាចរត់បាន៩០នាទី ឥតខ្ចោះក្នុងការប្រកួតនោះទេ។ ខ្ញុំមិនដែលជួបក្នុងអាជីពរបស់ខ្ញុំទេ ទោះបីជាកីឡាករក្នុងកម្រិតខ្ពស់របស់ប្រេស៊ីលយ៉ាងណាក៏ដោយ ក៏មិនអាចធើ្វបែបនេះបានដែរ»។

«ដូច្នេះអ្វីដែលយើងត្រូវគិតគឺ យើងត្រូវស្វែងយល់ពីវិធីយ៉ាងណាដើម្បីឲ្យក្រុមលេងល្អ ពេលដែលយើងហត់នឿយ។ ខ្ញុំនឹងនៅតែបន្ដព្យាយាមដោះស្រាយនូវបញ្ហានេះ» Honda បន្ថែម។